ເມືອງຊຽງຮ່ອນສຳເລັດກອງປະຊຸມກາງສະໄໝຂອງອົງຄະນະພັກ ສະໄໝທີ VII
ກອງປະຊຸມສະຫາຍ ກົງທອງ ສິດທິໄຊ ປະທານກອງປະຊຸມ ໄດ້ກ່າວເປີດກອງປະຊຸມໃນຄັ້ງນີ້ຢ່າງເປັນທາງການເຊິ່ງສະຫາຍໄດ້ກ່າວວ່າ: ຕະຫຼອດໄລຍະກາງສະໄໝ ຄະນະບໍລິຫານງານພັກເມືອງຊຽງຮ່ອນ ໄດ້ສຸມໃສ່ໃນການຈັດຕັ້ງປະຕິບັດມະຕິ VII ຂອງຕົນ ເພື່ອພັດທະນາເສດຖະກິດ-ສັງຄົມພາຍໃນເມືອງ ໃຫ້ມີການຂະຫຍາຍຕົວເທື່ອລະກ້າວ ເຮັດໃຫ້ທົ່ວເມືອງຮັກສາໄດ້ຄວາມສະຫງົບໂດຍພື້ນຖານ ເປັນຕົ້ນແມ່ນຄະນະພັກທຸກຂັ້ນໄດ້ເອົາໃຈໃສ່ເຮັດວຽກງານການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ, ທະຫານ-ຕໍາຫຼວດ ແລະ ປະຊາຊົນບັນດາເຜົ່າຢ່າງຕໍ່ເນືອງ, ຕິດພັນກັບວາລະແຫ່ງຊາດໂດຍສຸມໃສ່ແກ້ໄຂບັນຫາປະກົດການຫຍໍ້ທໍ້ຕ່າງໆໃຫ້ຫຼຸດລົງເທື່ອລະກ້າວສຸມໃສ່ການປູກພືດເປັນສິນຄ້າ ແລະ ພືດສະບຽງອາຫານຫຼາຍຂື້ນ, ຊຸກຍູ້ໃຫ້ນັກລົງທຶນທັງພາຍໃນ ແລະຕ່າງປະເທດ ເຂົ້າມາລົງທຶນໃຫ້ຫຼາຍຂື້ນສ້າງວຽກເຮັດງານທຳໃຫ້ປະຊາຊົນບັນດາເຜົ່າໃຫ້ມີຊີວິດການເປັນຢູ່ດີຂື້ນ ໃນວາລະກອງປະຊຸມຄັ້ງນີ້ໄດ້ຮັບຟັງບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2019-2022 (ກາງສະໄໝ) ແລະ ທິດທາງແຜນການປີ 2022-2024, ໂດຍລວມເສດຖະກິດຂອງເມືອງຍັງຂະຫຍາຍຕົວໃນລະດັບ 5,64% ທຽບໃສ່ຄາດໝາຍປະຕິບັດໄດ້ 80,34% ລວມຍອດລາຍຮັບພາຍໃນເມືອງໄດ້ທັງໝົດ 703,94 ຕື້ກວ່າກີບ, ສະເລ່ຍໃສ່ຫົວຄົນໜຶ່ງໄດ້ 20 ລ້ານກີບ ຫຼື ເທົ່າກັບ 2.003 ໂດລາ/ຄົນ/ປີ ທຽບໃສ່ແຜນການ 5 ປີປະຕິບັດໄດ້ 74,18%. ການແກ້ໄຂຄວາມທຸກຍາກຕາມ 4 ເນື້ອໃນ 4 ຄາດໝາຍມີຄອບຄົວທີ່ບໍ່ບັນລຸມາດຖານພົ້ນທຸກ 770 ຄອບຄົວ, ຄອບຄົວພັດທະນາ 5.902 ຄອບຄົວ, ເທົ່າກັບ 84,36%, ບ້ານພັດທະນາ 37 ບ້ານ, ເທົ່າກັບ86,4%, ບ້ານບໍ່ພົ້ນທຸກ 6 ບ້ານ. ພ້ອມກັນນີ້ ຍັງຍົກໃຫ້ເຫັນບາງຈຸດອ່ອນ ຂໍ້ຄົງຄ້າງທີ່ໄດ້ຍົກຂື້ນມາຄົ້ນຄວ້າເພື່ອຊອກຫາທິດທາງໃນການແກ້ໄຂໃນຕໍ່ໜ້າ. ການຊີ້ນຳ-ນຳພາຂອງອົງຄະນະພັກເມືອງໂດຍລວມຍັງຮັກສາໄດ້ ສະພາບລວມຂອງເມືອງແມ່ນມີຄວາມສະຫງົບໂດຍພື້ນຖານ, ປະກົດການຫຍໍ້ທໍ້ຕ່າງໆທີ່ເກີດຂື້ນໃນສັງຄົມແມ່ນມີແຜນການສະກັດກັ້ນໃຫ້ຫຼຸດໜ້ອຍຖອຍລົງ, ສະມາຊິກພັກ-ພະນັກງານ ແລະ ປະຊາຊົນບົນດາເຜົ່າ ມີຄວາມຮັບຮູ້ຕໍ່ແນວທາງປ່ຽນແປງໃໝ່ຢ່າງຮອບດ້ານຂອງພັກ, ມີຄວາມຕື່ນຕົວປະກອບສ່ວນເຂົ້າໃນພາລະກິດປົກປັກ ຮັກສາ ແລະ ສ້າງສາພັດທະນາປະເທດຊາດ.ກອງປະຊຸມກາງສະໄໝຂອງກອງປະຊຸມໃຫຍ່ຄັ້ງທີVII ຂອງອົງຄະນະພັກເມືອງ ຊຽງຮ່ອນ ດຳເນີນເປັນເວລາ 1 ວັນເຕັມ,ໂດຍມີຜູ້ແທນສົມບູນທົ່ວອົງຄະນະພັກເມືອງເຂົ້າຮ່ວມທັງໝົດ117 ສະຫາຍ,ຍິງ 9 ສະຫາຍ, ເຊິ່ງເປັນຕົວແທນໃຫ້ແກ່ສະມະຊິກພັກທັງໝົດ1.449 ສະຫາຍ, ຍິງ405ສະຫາຍ ບັນດາສະຫາຍເຂົ້າຮ່ວມກອງປະຊຸມໄດ້ຍົກສູງຄວາມຮັບຜິດຊອບແລະໄດ້ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດ-ຄຳເຫັນເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ສໍາເລັດຕາມຈຸດປະສົງທີ່ວາງໄວ້.
ຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ດວງຕາ ໄຊວຸດ ຮອງເລຂາ ຄະນະບໍລິຫານງານພັກແຂວງ ໄຊຍະບູລີ ເຊິ່ງໄດ້ຮຽກຮ້ອງມາຍັງຄະນະບໍລິຫານງານພັກເມືອງ, ຄະນະໜ່ວຍພັກ ຈົ່ງໄດ້ພ້ອມກັນສືບຕໍ່ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ກວ້າງຂວາງ-ທົ່ວເຖິງ, ເອົາໃຈໃສ່ສຶຶກສາອົບຮົມໃຫ້ປະຊາຊົນຊັ້ນຄົນຕ່າງໆ, ມີສະຕິຕໍ່ການຈັດຕັ້ງ, ລະບຽບກົດໝາຍ ແລະ ກົນອຸບາຍຫັນປ່ຽນໂດຍສັນຕິຂອງຄົນບໍ່ດີ ຢ່າງເປັນປົກກະຕິ, ເອົາໃຈໃສ່ສືບຕໍ່ກໍ່ສ້າງ ແລະ ປັບປຸງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີເຮັດວຽກຕາມ 5ຫຼັກການ ແລະ 3 ທິດນຳ ໃຫ້ບັນລຸຕາມຄາດໝາຍ, ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໂດຍສຸມໃສ່ການ ສົ່ງເສີ່ມການຜະລິດກະສິກໍາເປັນສິນຄ້າທີ່ຕິດພັນກັບການປຸງແຕ່ງ ຕາມທ່າແຮງ ແລະຄວາມສາມາດບົ່ມຊ້ອນຂອງເມືອງ ເພື່ອເຮັດໃຫ້ເມືອງ ຊຽງຮ່ອນ ມີການພັດທະນາຫຼຸດພົ້ນອອກຈາກຄວາມທຸກຍາກໃນຕໍ່ໜ້າ.
ໂດຍ: ດອນ ຂຽວພະນາ 020 5544 3362.