ພິທີເຊັນສັນຍາ ໂຄງການກໍ່ສ້າງນໍ້າປະປາເຂດທົ່ງກາບ

ໃນຕອນເຊົ້າຂອງວັນທີ 27 ກຸມພາ 2021 ນີ້ ຢູ່ທີ່ຫ້ອງປະຊຸມຫ້ອງວ່າການເມືອງ ໄດ້ຈັດພິທີເຊັນສັນຍາມອບໝາຍ ໂຄງການກໍ່ສ້າງນໍ້າປະປາຢູ່ທີ່ເຂດບ້ານທົ່ງກາບ ເມືອງຊຽງຮ່ອນ ລະຫວ່າງລັດວິສາຫະກິດນໍ້າປະປາ ແຂວງໄຊຍະບູລີ ກັບ ບໍລິສັດ ທໍ່ນໍ້າລາວອຸດສາຫະກຳເຕັກໂນໂລຊີ ຈຳກັດຜູ້ດຽວ ໂດຍການເປັນກຽດເຂົ້າຮ່ວມຂອງທ່ານ ບຸນລ້ວນ ຊົມສີຫາປັນຍາ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງຊຽງຮ່ອນ ມີທ່ານ ບຸນລົງ ດວງນາລີ ປະທານບໍລິສັດ ທໍ່ນໍ້າລາວອຸດສາຫະກຳເຕັກໂນໂລຊີ ພ້ອມທັງມີຜູ້ອຳນວຍການລັດວິສາຫະກິດນໍ້າປະປາແຂວງໄຊຍະບູລີ,ອຳນາດການປົກຄອງເມືອງ ຂະແໜງການກ່ຽວຂອງຂັ້ນແຂວງ ແລະ ຂັ້ນເມືອງເຂົ້າຮ່ວມ.

ໂຄງການກໍ່ສ້າງນໍ້າປະປາ ຢູ່ທີ່ເຂດບ້ານທົ່ງກາບ ເມືອງຊຽງຮ່ອນ ເປັນໂຄງການສະໜອງນໍ້າປະປາໃຫ້ແກ່ເຂດບ້ານທົ່ງກາບ ຈຳນວນ 8 ບ້ານຄື: ບ້ານທົ່ງກາບ, ບ້ານປົ່ງແປ້ນ, ບ້ານນໍ້າລ້ອມ, ບ້ານແກສີພົມ, ບ້ານພູລ້ານ, ບ້ານຫ້ວຍຮາກ, ບ້ານສີນົກໄຊ ແລະ ບ້ານຫ້ວຍຕອງ ໜ້າວຽກປະກອບມີ ລະບົບຫົວງານ, ອ່າງບໍາບັດນໍ້າຂະໜາດການຜະລິດ 60 ແມັດກ້ອນ ຕໍ່ຊົ່ວໂມງ ພ້ອມອ່າງເກັບນໍ້າຂະໜາດ 250 ແມັດກ້ອນ, ລະບົບທໍ່, ລະບົບໄຟ້າ, ຫ້ອງການ ແລະ ຜູ້ຊ່ວຍດ້ານເຕັກນິກ ລວມມູນຄ່າການກໍ່ສ້າງທັງໝົດ 8.201.878.820 ກີບ(ແປດພັນສອງຮ້ອຍໜຶ່ງລ້ານ ແປດແສນເຈັດສິບແປດພັນ ແປດຮ້ອຍຊາວກີບ) ໄລຍະການກໍ່ສ້າງ 180 ວັນ ນັບແຕ່ມື້ລົງມືການກໍ່ສ້າງ ໂຄງການກໍ່ສ້າງດັ່ງກ່າວນີ້ເປັນການສະໜອງນໍ້າໃຫ້ປະຊາຊົນເຂດດັ່ງກ່າວໄດ້ຊົມໃຊ້ນໍ້າປະປາຢ່າງສະດວກສະບາຍ