ສສຊ ເຜີຍແຜ່ຜົນສໍາເລັດ ກອງປະຊຸມສະໄໝວິສາມັນເທື່ອທີ 1 ຢູ່ເມືອງຊຽງຮ່ອນ
ໃນວັນທີ 28 ກັນຍາ 2021ນີ້ ຢູ່ທີ່ສະໂມສອນຂອງເມືອງ ຊຽງຮ່ອນ ແຂວງໄຊຍະບູລີ ໄດ້ຈັດພິທີເຜີຍແຜ່ຜົນສໍາເລັດ ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 7 ແຂວງໄຊຍະບູລີ ໂດຍໃຫ້ກຽດເຜີຍແຜ່ຂອງທ່ານ ເພັງນິລັນ ຄໍາພັນເພັງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ7 ປະທານສະພາປະຊາຊົນແຂວງໄຊຍະບູລີ, ໂດຍການເຂົ້າຮ່ວມຂອງທ່ານ ກົງທອງ ສິດທິໄຊ ເຈົ້າເມືອງໆຊຽງຮ່ອນ ມີບັນດາຄະນະປະຈໍາພັກເມືອງ ກໍາມະການພັກເມືອງ, ຫົວໜ້າ, ຮອງຫ້ອງການ, ກົມກອງອ້ອມຂ້າງເມືອງເຂົ້າຮ່ວມຢ່າງພ້ອມພຽງ.
ໃນການລົງເຜີຍແຜ່ຜົນສໍາເລັດ ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໂດຍໄດ້ສຸມໃສ່ປະກອບຄໍາເຫັນໃສ່ບັນຫາສຳຄັນພື້ນຖານຂອງປະເທດຊາດ ໄດ້ປຶກສາຫາລື ແລະ ຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ປຶກສາຫາລື ແລະ ຮັບຮອງກົດໝາຍທີ່ກ່ຽວຂ້ອງກັບວາລະແຫ່ງຊາດ ຈຳນວນ 5 ສະບັບຄື: ກົດໝາຍວ່າດ້ວຍ ການຄຸ້ມຄອງສ່ວຍສາອາກອນ, ກົດໝາຍວ່າດ້ວຍ ອາກອນມູນຄ່າເພີ່ມ, ກົດໝາຍວ່າດ້ວຍ ອາກອນລາຍໄດ້, ກົດໝາຍວ່າດ້ວຍ ອາກອນຊົມໃຊ້ ແລະ ກົດໝາຍວ່າດ້ວຍ ຢາເສບຕິດ. ນອກນັ້ນ, ກອງປະຊຸມຍັງໄດ້ຮັບຟັງການລາຍງານຂອງລັດຖະບານກ່ຽວກັບສະພາບການແຜ່ລະບາດຂອງພະຍາດໂຄວິດ-19 ແລະ ມາດຕະການແກ້ໄຂຜົນກະທົບຈາກການແຜ່ລະບາດຂອງໂຄວິດ 19 ນອກນີ້, ຍັງໄດ້ນຳສະເໜີພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ມາເຜີຍແຜ່ເຊື່ອມຊືມໃຫ້ຜູ້ມີສິດເລືອກຕັ້ງ ໄດ້ຮັບຮູ້ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໃຫ້ຖັນແຖວພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ຮັບຮູ້ຢ່າງກວ້າງຂວາງ ແລະ ທົ່ວເຖີງ. ພ້ອມດຽວກັນນັ້ນ ສະມາຊິກສະພາຍັງໄດ້ລົງເຜີຍແຜ່ຜົນສຳເລັດໃຫ້ຜູ້ມີສິດເລືອກຕັ້ງຢູ່ 3 ຈຸດຄື: ບ້ານ ທາດ, ບ້ານ ປົ່ງແປ້ນ ແລະ ບ້ານ ນາອອນ ຕື່ມອິກ.
ໂດຍ: ດອນ ຂຽວພະນາ ຖວທ ມ ຊຽງຮ່ອນ 020 5544 3362
