ຜູ້ເຂົ້າຍ້ຽມຊົມ

4726
ມື້ນີ້ມື້ນີ້121
ມື້ວານນີ້ມື້ວານນີ້199
ອາທິດນີ້ອາທິດນີ້1295
ເດືອນນີ້ເດືອນນີ້4726
ລວມທັງໝົດລວມທັງໝົດ4726

ມີ 71  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ລາວໂທລະຄົມເປີດນໍາໃຊ້ລະບົບ 5G


ໃນ​ວັນ​ທີ 31 ສິງຫານີ້, ທີ່ ໂຮງແຮມ ລາວພລາຊາ ນະຄອນຫຼວງວຽງຈັນ ບໍລິສັດ ລາວ ໂທລະຄົມມະນາຄົມ ມະຫາຊົນ ​ໄດ້​​ມີພິທີເປີດນໍາໃຊ້ ລະບົບ 5G ຢ່າງເປັນທາງການ ເຊິ່ງເປັນເຄື່ອຂ່າຍທໍາອິດໃນ ສປປ ລາວ. ກ່າວເປີດພິທີໃນຄັ້ງນີ້ໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດລາວໂທລະຄົມມະນາຄົມມະຫາຊົນ (ລລທ), ໃຫ້ກຽດເຂົ້າຮ່ວມໂດຍ ທ່ານ ປອ ທັນສະໄໝ ກົມມະສິດ ກໍາມະການສູນກາງພັກ, ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະນໍາ ກະຊວງ ປທສ, ມີບັນດາຫົວໜ້າກົມ/ທຽບເທົ່າ, ຮອງຫົວໜ້າກົມ ອ້ອມຂ້າງກະຊວງ ປທສ, ຄະນະອໍານວຍການ, ຜູ້ບໍລິຫານ ລາວໂທລະຄົມ ແລະ ບັນດາສື່ມວນຊົນເຂົ້າຮ່ວມ.

            ເພື່ອຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ ກໍຄືວຽກງານ ຂອງ ກະຊວງ ປທສ  ໃນການຫັນການບໍລິການໂທລະຄົມໃຫ້ເປັນທັນສະໄໝ ສາມາດເຊື່ອມໂຍງກັບພາກພື້ນ ແລະ ສາກົນໄດ້ ໂດຍສະເພາະໃນຍຸກເສດຖະກິດ ດີຈິຕອນ 4.0 (Digital Economy Era). ດັ່ງທີ່ພວກເຮົາໄດ້ຮັບຊາບກັນແລ້ວໃນຍຸກປະຈຸບັນການນຳໃຊ້ເຄື່ອງມືສື່ສານ ແລະ ການບໍລິການຂອງໂທລະຄົມ ແມ່ນໄດ້ກາຍເປັນປັດໃຈທີ່ສຳຄັນໃນການດຳລົງຊີວິດຂອງມະນຸດເຮົາ ເວົ້າລວມ ເວົ້າໂດຍສະເພາະກໍແມ່ນຂອງສັງຄົມຢູ່ໃນ ສປປລາວ ເຮົາ. ໃນປະຈຸບັນໄດ້ມີຫລາຍປະເທດໃນທົ່ວໂລກ ແລະ ຂົງເຂດອາຊີບ ແມ່ນໄດ້ທົດລອງນຳໃຊ້ ເທັກໂນໂລຊີ 5G ເຂົ້າຮັບໃຊ້ສັງຄົມຢູ່ໃນຫລາຍຂົງເຂດວຽກງານເຊັ່ນ: ທາງດ້ານທຸລະກິດ ອອນລາຍ E-commerce, ນໍາໃຊ້ປັນຍາປະດິດ ຫຼື Ai, IoT, Robotic ເຂົ້າໃນຂົງເຂດອຸດສາຫະກຳ, ກະສິກຳ ແລະ ການແພດອື່ນໆ ຊື່ງລ້ວນແລ້ວແຕ່ເປັນການສ້າງເງື່ອນໄຂໃຫ້ສັງຄົມຫລືຜູ້ຊົມໃຊ້ມີວິຖີຊີວິດນັບມື້ນັບສະດວກ ແລະ ວ່ອງໄວ ມີຄວາມປອດໄພສູງ.

          ໃນວັນທີ 8/10/2019 ທີ່ຜ່ານມາ ລາວໂທລະຄົມ ກໍ່ໄດ້ມີພິທີເປີດທົດລອງນໍາໃຊ້ລະບົບ 5G ມາແລ້ວຄັ້ງໜຶ່ງເພື່ອເປັນການກຽມຄວາມພ້ອມດ້ານຕ່າງໆກ່ອນການເປີດໃຫ້ບໍລິການຢ່າງເປັນທາງການ. ພ້ອມດຽວກັນນີ້, ພາຍໃນງານເປີດໂຕ ຍັງໄດ້ມີການສາທິດ ບັນດາ show case ຈຳນວນໜຶ່ງ ເພື່ອສະແດງໃຫ້ເຫັນວ່າ ລະບົບ 5G ມີສັກຂະຍະພາບທີ່ທັນສະໄໝ ແລະ ຄວາມໄວໃນການສົ່ງຂໍ້ມູນເທົ່າໃດ.  ສຳລັບພື້ນທີ່ ທີ່ໃຫ້ການບໍລິການລະບົບ 5G ໃນເບື້ອງຕົ້ນ ລລທ ຈະເປີດການໃຫ້ບໍລິການຢູ່ໃນບາງພື້ນທີ່ຂອງນະຄອນຫລວງວຽງຈັນກ່ອນ ເຊັ່ນ: ເຂດສີຫອມ, ຕະຫລາດກາງຄືນແຄມຂອງ, ເຂດສາຍລົມ ແລະ ມະຫາວິທະຍາ ໄລແຫ່ງຊາດ (ວິທະຍາເຂດດົງໂດກ). ແລ້ວຈະສືບຕໍ່ພັດທະນາຂະຫຍາຍລະບົບອອກໄປສູ່ບັນດາແຂວງພາຍໃນປະເທດ.

ລະບົບ 5G ມີຄຸນສົມບັດພິເສດຫຼັກໆຢູ່ 3 ຢ່າງທີ່ແຕກຕ່າງກັບລະບົບ 4G ຄື: (1)ຄວາມໄວ:  ຄວາມໄວໃນການຮັບ-ສົ່ງຂໍ້ມູນທີ່ໄວກວ່າ 4G  ເຖີງ 20 ເທົ່າ ຕົວຢ່າງ: ເມື່ອໂຫຼດໜັງທີ່ມີຄວາມຍາວ 2 ຊົ່ວໂມງ 4G ຈະໃຊ້ເວລາປະມານ 6-7 ນາທີ ໃນຄະນະທີ່ 5G ຈະໃຊ້ເວລາພຽງ 3-4 ວິນາທີ, ການເບິ່ງຮູບເງົາແບບ online ທີ່ມີຄວາມລະອຽດສູງລະດັບ HD 4K, 8K  ຈະບໍ່ເປັນອຸປະສັກອີກຕໍ່ໄປ, ສາມາດປົດລ໋ອກຄຸນສົມບັດສູງສຸດຂອງ AR (Augmented Reality) ແລະ VR ( Virtual Reality) ກັບປະສົບການທີ່ສົມຈິງທີ່ເກີດຈາກການໃຊ້ຂໍ້ມູນຈໍານວນຫຼາຍໃນການປະມວນຜົນ ເຊິ່ງ 5G ຈະຕອບໂຈດການສື່ສານຜ່ານ AR ແລະ VR ໄດ້ຢ່າງສົມບູນແບບ, (2)ຄວາມສາມາດຮອງຮັບການເຊື່ອມຕໍ່: ຈໍານວນການເຊື່ອມຕໍ່ທີ່ສາມາດຮອງຮັບອຸປະກອນໄດ້ຫຼາຍກວ່າ 4G 10 ເທົ່າ ຫຼື ເທົ່າກັບ  1,000,000 ອຸປະກອນ/sq.km ດ້ວຍລະບົບ 5G ຈະເປີດໂລກ IOT (Internet of Things)ໄດ້ຢ່າງແທ້ຈິງ ແລະ ຈະເປັນພື້ນຖານເພື່ອຮອງຮັບການພັດທະນາເຕັກໂນໂລຊີ Smart Home, Smart City, Smart Transportation, Smart life, Smart health ແລະ ອຶ່ນໆ ໂດຍສັ່ງການຜ່ານມືຖືຂອງຄົນເຮົາໄດ້ ຫຼື ອຸປະກອນແຕ່ລະຊະນິດສາມາດສື່ສານກັນເອງໄດ້, ຄວບຄຸມກັນໄດ້  ແລະ ເຮັດວຽກປະສານກັນໄດ້ຢ່າງອັດຕະໂນມັດ, (3)ເວ ລາໃນການຕອບສະໜອງ/ໂຕ້ຕອບ: ສັ້ນລົງ ເຖີງ 1 ມິນລີວິນາທີ (1 ms), 5G ຈະສາມາດຕອບໂຈດ ໃນສ່ວນຂອງກຸ່ມຄົນທີ່ມັກຫຼີ້ນເກມເຊິ່ງຕ້ອງການຄວາມໄວໃນການໂຕ້ຕອບສູງ ຫຼື ເວົ້າອີກຢ່າງຄືຖ້າ Latency ຍິ່ງຕໍ່າແມ່ນຍີ່ງດີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະ ນໍາໃຊ້ໃນທາງການແພດເຊັ່ນ: ການຜ່າຕັດທາງໄກ ແລະ ອຶ່ນໆ.

                (ຮູບພາບສົມທຽບຄວາມແຕກຕ່າງລະຫວ່າງ 5G ກັບ 4G)

ພາບ+ຂ່າວ: ຫ້ອງການ

ເຕືອນໄພທາງອິນເຕີເນັດ

ວາ​ລະ​ສານ ໄອ​ຊີ​ທີ

ສະຫງວນລິຂະສິດ ©  2020, ເມືອງຊຽງຮ່ອນ ແຂວງໄຊຍະບູລີ.
ໂທ / ແຟັກ : 074 810003 .